اللي عندك برد ولا إنفلونزا؟..

 اللي عندك برد ولا إنفلونزا؟.. عمرك سألت نفسك السؤال دا

إجابة السؤال هتغير طريقة تعاملك مع المرض لأن البرد حاجة والانفلونزا حاجة تانية خالص.. تعالي اشرحلك ازاي تعرف تفرق بينهم والطريقة الصحيحة ف التعامل معاهم ..

كتير بيجيلهم اعراض برد أو انفلونزا ويتلخبط وميعرفش يفرق هو عنده إيه منهم ولأن الأعراض متشابهة بدرجة كبيرة لكنهم في الحقيقة حالتين مختلفين عن بعض تمامًا من حيث السبب، الشدة، ومدة التعب. في المقالة دي هنتكلم عن الفروق الأساسية بينهم لمساعدة القراء على التمييز بين الحالتين والتعامل معهم بشكل صحيح.

أولا: أسباب المرض

البرد العادي: ممكن يسببه أكتر من 200 فيروس مختلف. أشهرهم rhinovirus ومعظمهم خفيفين وضعيفين و بيركزوا على الأنف والحنجرة. زي حرامي بيدخل من الشباك وبيتسحب ببطئ وسهل مقاومته.

· الانفلونزا: بتسببها فيروسات تخص الإنفلونزا بس، وهي أشرس بكتير. دي مش لعبة... بتستهدف الرئتين والشعب الهوائية على طول. زي جيش منظم بيغزو الجسم وخاصة الرئتين ونقدر تشبهها ب شلة بلطجية معاهم سلاح ومقاومتهم محتاجة مساعدة خارجية لأن ف الأغلب مش هتقدر تعتمد علي مناعتك لوحدها

· تسببها فيروسات الإنفلونزا (Influenza viruses) بأنواعها A، B، وC

· فيروس شديد العدوى ومتغير سنويًا

· يصيب الجهاز التنفسي السفلي (القصبات الهوائية والرئتين) بشكل رئيسي

ثانيا : إزاي أعرف مين فيهم عندي؟

لو ده برد عادي:

· الأعراض بتجيلك ببطء على مدار يوم أو يومين زي ما قولنا شبه الحرامي

· مش هتحس بحرارة عالية، غالبًا حرارة بسيطة أو منعدمة.

· هتحس بتعب خفيف، تقدر تشتغل وتذاكر (بصعوبة طبعًا).

· رشح جامد، عطس، والم ف الحلق .

· مش هتحس أن عضلاتك بتوجعك أوضهرك اتكسر.

لو ده انفلونزا:

· الأعراض بتبقي في وشك فجأة في ساعتين تلاتة!

· حرارة عالية (38 درجة وممكن أكثر) وبردان وهتعرق جامد.

· هتحس بتعب وإرهاق شديد. مش هتقدر تقوم من السرير حرفيًا.

· كل عضلات جسمك هتوجعك دماغك تقيلة جدا و صداع شديد. هتحس إنك اتضربت علقة موت.

· ممكن يكون في رشح وعطس برضو، لكن مش شرط.

ثالثا: إيه اللي هتعمله في كل حالة؟

لو عندك برد:

· غالبًا هتعدي من نفسها في خلال أسبوع.

· ركز على شرب سوائل كتير (ميه دافية، ليمون، يانسون).

· نام كويس وريح جسمك.

· خد مسكن عادي لو محتاج (باراسيتامول مثلًا).

· متتعبش نفسك وخللي مناعتك تشتغل.

تقدر تساعد المناعة بشوية حاجات زي فيتامين سي و زنك و فيتامين د ولو مخدتش عادي مش مشكلة بس بنحاول نقلل مدة التعب بدل ما يكون اسبوع او اكتر يكون يومين او تلاتة

لو عندك انفلونزا:

· قولا واحدا روح للدكتور، خاصة لو أنت كبير في السن، عندك مرض مزمن، أو ليك في البيت أطفال صغيرين أو كبار.

· الراحة التامة في السرير مش اختيار، دي ضرورة.

· شرب السوائل أهم من الأكل.

· الدكتور ممكن يعطيك أدوية مضادة للفيروسات لو لاقاك في أول 48 ساعة من المرض، وهي هتخفف الأعراض وتقصر مدة المرض. (مفعولها قوي ف إنهاء التعب خلال مدة قصيرة )

· خافض الحرارة لازم علشان الحرارة العالية خطيرة.

رابعا.: الموضوع كام يوم؟

· البرد: غالبًا أسبوع، والأعراض بتكون أسوأ في يومين تلاتة.

· الانفلونزا: الأعراض الشديدة حوالي أسبوع، لكن التعب والإرهاق ممكن يفضلوا معاك لحد أسبوعين. يعني تقدر تقوم تمشي، لكن حتلاقي نفسك بتتعب بسرعة.

خامسا : امتى أروح المستشفى فورًا؟

خلي بالك من العلامات دي، لو حصل واحدة منهم، مش وقت تتصل بصاحبك، ده وقت تروح للمستشفى:

· لو حسيت بضيق في التنفس أو ألم في صدرك.

· لو الحرارة فضلت عالية أكثر من تلات أيام.

· لو حسيت بدوخة أو عدم تركيز جامد.

· لو الأعراض خفت وبعدين رجعت تاني أقوى من الأول (خطر!).

سادسًا وأخيرًا: الوقاية أفضل من العلاج

· غسل الإيدين بالصابون باستمرار أهم حاجة.

· لقاح الإنفلونزا السنوي ده سلاحك الأقوى ضد الانفلونزا، خده وانت مطمئن.

· متقعدش قدام حد بيعطس أو بيرشح.

· ريح جسمك واكل صحي، المناعة القوية هي درعك.

الخلاصة :

البرد مزعج، لكنه غالبًا بيعدي.

الانفلونزاخطيرة وممكن تسبب مضاعفات.

فبلاش نقول "دور برد" على كل حاجة.. اعرف الفرق، عالج نفسك صح، واعرف امتي تروح للدكتور أو تستشير الصيدلي.

د. عمرو طلعت